Latest News

தேவை தமிழ்ப்பற்று மட்டுமே. தமிழ் வெறி அல்ல...


இன்றைக்கு எந்த அரசியல் தலைவரை எடுத்தாலும் தமிழை வைத்து கட்சியை வளர்ப்பவர்களின் எண்ணிக்கை அதிகமாகி விட்டது. தமிழுக்கே தாங்கள் தான் காவலன் என்பது போல் தங்களுக்கு தாங்களே தமிழறிஞர்கள் பட்டம் சூட்டிக் கொள்கின்றனர். தமிழ் மேல் தமிழர்களுக்கு பற்று தேவைதான். ஆனால் அது தமிழ் வெறியாக மாறக்கூடாது. 

பாரதியார் யாமறிந்த மொழிகளிலே தமிழ் மொழி போல் இனிதாவது எங்கும் காணோம் என்று கூறினார் என்றால், அவருக்கு தமிழைத் தவிர ஆங்கிலம்,பிரெஞ்ச்,இந்தி,மராட்டியம் போன்ற பல மொழிகள் தெரிந்து வைத்திருந்தார். எனவே எல்லா மொழிகளையும் விட தமிழ் மொழி சிறந்தது என்று கூறினார். இன்றைக்கு இருக்கும் தமிழர்களில் எத்தனை பேருக்கு தமிழும், அரைகுறையான ஆங்கிலத்தையும் தவிர வேறு மொழி தெரியும்? 


இந்தியாவில் மொத்தம் 42 மொழிகள் உள்ளன. ஆனால் எல்லா மொழிகளையும் தெரிந்து வைத்துக் கொள்வது என்பது இயலாத ஒன்று. ஆனால் ஒரு சில முக்கிய மொழிகளைப் பற்றிய அடிப்படை அறிவு எல்லோருக்கும் தேவை என்பதை நாம் புரிந்து கொள்ள வேண்டும்.  குறிப்பாக இந்தி மொழி என்பது நமது தேசிய மொழி. அதை அனைவரும் தெரிந்து வைத்துக் கொள்ளுதல் நலம். பயக்கும்., இந்தியா முழுவதும் தொழில் விஷயமாகவோ, சுற்றுலாவோ சென்றால் முதலில் நமக்கு உதவுவது இந்தி மொழிதான். 

அதுபோலவே ஆங்கிலத்திலும் அக்கறை செலுத்துதல் அவசியம். நம்முடைய மேற்படிப்பு,தொழில்,மற்றும் தகவல் தொடர்புகளுக்கு ஆங்கில அறிவு இன்றியமையாதது. உலகம் முழுவதும் தெரிந்த மொழி என்பதால் அதற்கு கூடுதல் மதிப்பு கொடுத்து ஓரளவிற்கு பேசுவதற்கும்,எழுதுவதற்கும் தெரிந்து வைத்து கொள்ளுதல் நலம்.


அதுபோலவே நம்முடைய அண்டை மாநில மொழிகளான மலையாளம்,கன்னடம்,தெலுங்கு முதலியவற்றை ஓரளவிற்கு தெரிந்து வைத்துக் கொள்வது நல்லது. கருத்து பரிமாற்றங்களுக்கும், தகவல் தொடர்பிற்கு இவை மிகவும் பயனுள்ளதாக இருக்கும்.   

இந்தியாவில் தமிழர்களைத் தவிர எல்லோரும் மூன்று அல்லது நான்கு மொழிகள் சர்வசாதாரணமாக பேசும் திறன் படைத்தவர்களாக இருக்கின்றனர். நாம் மட்டும்தான் தமிழ்,தமிழ் என்று ஒரே மொழியை வைத்துக் கொண்டு குண்டுச்சட்டியில் குதிரை ஓட்டிக் கொண்டிருக்கிறோம்.


இவ்வாறு பேசுவதாலோ,எழுதுவதாலோ நாம் தமிழுக்கு எதிரி அல்ல என்பதை தமிழ் அறிஞர்கள் புரிந்து கொள்ள வேண்டும். தமிழை உலகம் முழுவதும் வளர்ப்பது எவ்வாறு நமது கடமையோ,அது போலவே உலக மொழிகளை நாம் தெரிந்து வைத்துக் கொள்வதும் நம்முடைய அன்றாட வாழ்க்கைக்கு தேவையான ஒன்று.


இரண்டு தலைமுறைகளாக நம்மை ஆட்சி செய்யும் அரசியல்வாதிகள் தமிழை வைத்து வியாபாரம் செய்து, அவர்களது வளத்தை பெருக்கினார்களே தவிர, நம்முடைய வளர்ச்சியை அவர்கள் சிறிதும் எண்ணிப்பார்க்கவில்லை. அவர்களுடைய வாரிசுகளுக்கு எல்லா மொழிகளையும் கற்றுக் கொடுத்து வளர்த்துள்ளார்கள். ஆனால் பொதுமக்களுக்கு மட்டும் தமிழை தவிர வேறு மொழிகளை கற்றுக்கொடுக்காமல் நம்முடைய தலைமுறையினரின் வாழ்க்கையில் விளையாடி உள்ளனர்.



அரசியல்வாதிகளுக்கு தேவை மக்களின் உணர்ச்சியை தூண்டிவிட்டு,அதில் குளிர்காய வேண்டும் என்பதே. இனிமேலும் அவர்களின் சூழ்ச்சிக்கு பலியாகாமல் தமிழை உலகம் முழுவதும் வளர்ப்போம். அதுபோல் பிறமொழிகளில் உள்ள நல்ல விஷயங்களையும் போற்றுவோம்.

Follow by Email

Recent Post