தினம் தினம் ஒரு ‘தினம்’!




தினமும் தலைப்புகள் பற்றிப் பேசலாம் என்று சொல்லிவிட்டு நேற்று திசை மாறி ‘ஆசிரியர் தினம்’ பற்றி எழுதிவிட்டேன். இப்போது நம் பாதைக்கு வருவோம் மீண்டும்!

இந்த தினங்களை பற்றியே எழுதிவிடலாம்! கையில் வெண்ணையை வைத்துக் கொண்டு நெய்க்கு அழுவார்களா?

ஜனவரியில் ஆரம்பித்து டிசெம்பர் முடிய எத்தனை ‘தினம்!’

ஜனவரி முதல் தேதி – புதிய வருடத்தின் முதல் தினம்! நீங்கள் இந்த வருடம் என்னவெல்லாம் செய்ய வேண்டும் என்று உறுதிமொழி எடுத்திருக்கிறீர்கள்? அவற்றை பற்றி – ஏன் அந்த உறுதி மொழி? இதன் பின்புலம் என்ன?  எத்தனை நாட்களில் அதை நிறைவேற்ற வேண்டும்? எழுதுங்கள். பதிவு எழுதுவதால் உங்கள்  உறுதிமொழி காற்றில் பறந்து போகாமல் இருக்கும். பதிவில் போட்டுவிட்டதால் உறுதி மொழியைக் காப்பாற்ற உங்களுக்கும் ஒரு உந்துதல் இருக்கும். மற்றவர்களுக்கு நல்ல உதாரணமாக இருப்பீர்கள்.

அடுத்தபடி குடியரசு தினம். எல்லோருக்கும் தெரிந்தது என்றாலும் நமது குடியரசை எப்படிக் காக்கலாம், குடிமக்களின் கடமை என்ன – நம் நாட்டில் படித்தவர்கள் பலர் தேர்தலில் வாக்களிப்பதில்லை. வாக்களித்தலின் முக்கியத்துவம் பற்றி எழுதலாம். இவர்கள் ஏன் வாக்களிப்பதில்லை? அவர்களை எப்படி வாக்களிக்க வைப்பது?

மாதங்களின் பெயர்கள் எப்படி வந்தன என்று கூட ஒரு பதிவு எழுதலாம். வல்லவனுக்குப் புல்லும் ஆயுதம்!

ஃபிப்ரவரியில் வாலண்டைன்ஸ் தினம்! எனது யோசனைகளை வேண்டவே வேண்டாம். நீங்களாகவே எழுதலாம்.

மார்ச் மாதம் மகளிர் தினம்.

ஏப்ரலில் தமிழ் வருடப் பிறப்பு! தமிழை வைத்தே பதிவுகளைத் தேற்றலாம்! தமிழ் மொழி, தமிழ் மண், தமிழ் பண்பாடு, தமிழ் பண்டிகைகள், தமிழன், தமிழ் நூல்கள், தமிழ் புலவர்கள்.....

மே மாதம் அன்னையர் தினம், தொடர்ந்து வருவது தந்தையர்கள் தினம்; ஆசிரியர் தினம் குழந்தைகள் தினம் என்று தினங்களின் அணிவகுப்பு மிக நீண்டது.

எனக்குத் தெரிந்த தினங்கள் பற்றி மட்டும் நான் எழுதுகிறேன். இன்னும் பல இருக்கின்றன.

சில நோய்களைப் பற்றிய விழிப்புணர்வு ஏற்படுத்தும் தினங்கள்; உலகளவில் பலபல தினங்கள் அனுசரிக்கப் படுகின்றன. தினசரி செய்தித்தாள்கள் படித்தால் இவையெல்லாம் தெரிய வரும்.

இவற்றைத் தவிர திருமண நாள், பிறந்த நாள், தலைவர்களின் நினைவு நாள் என்று யோசித்து யோசித்து நிறைய எழுதலாம். உங்களின், உங்கள் பெற்றோர்களின், உங்களுக்குத் தெரிந்தவர்களின் 25 வது திருமண நாள், 50 வது திருமண நாள் என்று அவர்களது வாழ்வின் வெற்றியை எழுதலாம்.

இந்த மாதிரி நாட்கள் என்று தனியே கொண்டாடுவது அவசியமா என்று கூட ஒரு விவாதம் நடைபெற்று வருகிறது. அதைப்பற்றி உங்கள் கருத்துக்களை எழுதலாம்.

எழுதுவது பற்றி இன்னும் சில சிந்தனைகள்:

தினம் ஒரு பதிவு எழுத வேண்டும் என்ற அவசியம் இல்லை. எழுதினாலும் தவறு இல்லை. தினம் எழுத விஷயம் வேண்டுமே! இருக்கவே இருக்கிறது செய்தித்தாள்கள்; வார, மாதாந்திர பத்திரிக்கைகள்! அதில் படிக்கும் விஷயங்களுடன் உங்கள் சொந்த கருத்துக்கள், அனுபவங்கள் என்று சேர்த்து எழுதலாம்.

எழுத நினைப்போம் ஆனால் கணணி முன் உட்கார நேரம் கிடைக்காது. அதனால், ஒரு சின்ன நாட்குறிப்புப் புத்தகம் எப்போதும் கைவசம் இருக்கட்டும். எழுத ஒரு சின்ன யோசனை தோன்றினாலும் எழுதி வைத்துக் கொள்ளுங்கள்.

அதேபோல உங்களுக்கு வரும் மின்னஞ்சலில், பல அருமையான கட்டுரைகள் கிடைக்கும். இவற்றையெல்லாம் ஒரு தனி கோப்புறையில் (folder) போட்டு வையுங்கள்.

ஆங்கிலத்தில் வரும் கட்டுரைகளை மொழியாக்கம் செய்யலாம். தெரியாத ஆங்கிலப்பதங்களுக்கு கூகிள் மொழிபெயர்ப்பு (Google Translator) உதவும். பல ஆங்கில தமிழ் அகராதிகளும் இணையத்தில் கிடைக்கும்.

நம் படைப்புகள் நமக்கு என்றுமே சிறந்ததாகத் தான் தோன்றும். அதனால் எழுதியவுடன் உங்கள் நண்பரிடமோ, துணைவரிடமோ கொடுத்துப் படிக்கச் சொல்லுங்கள். முதலிலிருந்து கடைசி வரை ஒரு தொடர்ச்சி இருக்கிறதா என்று பார்க்கச் சொல்லுங்கள். நீங்கள் எழுத எடுத்துக்கொண்ட விஷயத்திலிருந்து விலகாமல் இருக்கிறதா உங்கள் கட்டுரை என்று கேளுங்கள்.

இணையத்தில் கிடைக்கும் விஷயங்களை – அந்தப் பக்கத்தையே ‘புக்மார்க்’ அல்லது ‘favourite’ என்று குறித்து வைக்கலாம். நேரம் கிடைக்கும்போது எழுதலாம்.

வலையுலகம் மிகப் பெரியது. இந்த மிகப் பிரம்மாண்டமான உலகத்தில் உங்களை கவனிக்க வேண்டுமானால் உங்கள் எழுத்துக்கள் தனித்துத் தெரிய வேண்டும்.

நிறைய வலைப்பதிவுகளைப் படியுங்கள். படிக்கப் படிக்க உங்களுக்குள் ஒரு விழிப்புணர்வு வரும். இப்படி இப்படியெல்லாம் எழுதலாம் என்கிற அறிவு வரும். பலப்பல நுணுக்கமான விஷயங்கள் புரியும்.

மற்றவர்களுக்குப் புரியும்படி எழுதுவது நல்லது. ஏனெனில் இதில் இரண்டு விஷயங்கள் உள்ளன: ஒன்று நாம் புரிந்து கொள்ளுவது; இன்னொன்று நாம் புரிந்து கொண்டதை மற்றவர்களுக்குப் புரிய வைப்பது. இரண்டாவதில் உங்கள் எழுத்து வெற்றி பெற்று விட்டால் பதிவுலகம் உங்கள் வசப்படும்.

வாழ்த்துக்கள்!


























17 comments:

எழுத நினைப்போம் ஆனால் கணணி முன் உட்கார நேரம் கிடைக்காது. அதனால், ஒரு சின்ன நாட்குறிப்புப் புத்தகம் எப்போதும் கைவசம் இருக்கட்டும். எழுத ஒரு சின்ன யோசனை தோன்றினாலும் எழுதி வைத்துக் கொள்ளுங்கள்.

அருமையான யோசனை அம்மா. நிறைய இன்னும் நான் பின்பற்ற வேண்டியிருக்கிறது. பகிர்விற்கு நன்றி

இதற்கு மேல் "பதிவு எழுதுவது எப்படி" என்று யாராலும் இவ்வளவு சிறப்பாக சொல்ல முடியாது...

ஒவ்வொரு பத்தியும் அருமை...

/// நம் படைப்புகள் நமக்கு என்றுமே சிறந்ததாகத் தான் தோன்றும். அதனால் எழுதியவுடன் உங்கள் நண்பரிடமோ, துணைவரிடமோ கொடுத்துப் படிக்கச் சொல்லுங்கள். ///

எழுத்துப் பிழைகளையும் சரி செய்ய உதவும்...

/// நிறைய வலைப்பதிவுகளைப் படியுங்கள். படிக்கப் படிக்க உங்களுக்குள் ஒரு விழிப்புணர்வு வரும். ///

நிறைய வலைப்பதிவுகளைப் படிக்கச் சொல்லி உள்ளீர்கள்... அது போல் புத்தகங்களும் என்பதை சேர்த்துக் கொள்ளுங்கள்...

இன்னும் நிறைய சொல்லலாம்... சுருக்கமாக :

இந்தப் பதிவு புதிதாக பதியுலகம் வரும் நண்பர்களுக்கு மட்டுமல்ல...

நன்றி அம்மா... வாழ்த்துக்கள்...

பதிவு எழுதுகிறவர்களுக்கு நல்ல யோசனைகள் சொல்லி இருக்கீங்க. எல்லாருக்குமே பயன்படும் நன்றி

பயனுள்ளதாக அமைந்தது பற்றி மகிழ்ச்சி தமிழ் ராஜா! நன்றி!

படிக்க வேண்டியதைப் பற்றி ஒரு பதிவு போடலாம் என்று இருக்கிறேன் தனபாலன்; உங்கள் குறிப்பை நினைவில் வைத்துக் கொள்ளுகிறேன்! வரிக்குவரி படித்து பின்னூட்டம் கொடுக்கும் உங்களுக்கு 'பின்னூட்ட மன்னர்' என்று பட்டம் கொடுக்கிறேன் எல்லாப் பதிவர்கள் சாரிபிலும், தொழிற்களம் குழு சார்பிலும்!

நன்றி லக்ஷ்மி அம்மா! திருமதி காமாட்சி உங்களுடன் பேச வேண்டும் (பதிவு மூலம்தான்) என்று சொல்லிக் கொண்டிருந்தார். அவரும் மும்பையில் தான் இருக்கிறார். அவரது வலைத்தளம்: chollugireen.wordpress.com

முடிந்தால் அங்குப் போய் பாருங்களேன்!

நன்றி!





திருமதி காமாட்சி அம்மாவின் வலைத்தளம்
chollukireen.wordpress.com
தவறாக எழுதிவிட்டேன். மன்னிக்கவும்!

ஒரு சிறப்பான தொடர்பதிவு கொடுத்து வருகிறீர்கள் அம்மா,,

முந்தைய பதிவின் முடிவிலி இருந்து ஆரம்பம் செய்து எழுதுங்கள்,, இன்னும் மெருகேரும்..

மேலும் முந்தைய பதிவின் இணைப்பையும் தவறாமல் அளிப்பதன் மூலம் புதியவர்களுக்கு பயனளிக்கும்,,

அருமை,,,

உங்கள் யோசனைகளைக் குறித்துக் கொண்டேன். இன்றிலிருந்து நடைமுறைப் படுத்துகிறேன்.
உங்கள் ஊக்கத்திற்கு நன்றி!

இந்தப் பதிவை படித்ததில் மிக மகிழ்ச்சி அம்மா, அருமையாக குழந்தைக்கு கூறுவது போல் கூறி உள்ளீர்கள், அலுவலகத்தில் எனக்கு அலுவல் கொஞ்சம் அதிகம், அதை மறக்க பதிவு உலகம் ஒரு சிறந்த கருவி, ஆனாலும் பதிவு எழுதுவதுள் சமயங்களில் எனக்கு சலிப்பு ஏற்படும், காரணம் சில நேரங்களில் என்ன எழுதுவது என்று தெரியாமல் போகும், என் போன்றவர்களுக்கு தேவையான பதிவு

நன்றி சீனு! என் கருத்துக்கள் பலரையும் சிந்திக்க செய்வது மகிழ்ச்சியாக இருக்கிறது.

பலப்பல நுணுக்கமான விஷயங்கள் பகிர்ந்தமைக்குப் பாராட்டுக்கள் !

தெளிவான, பதமான விளக்கங்கள், என் பதிவையும் பாருங்கள், அதிலும் பதிவு தொடர்பாய் எழுதி இருக்கிறேன், நன்றி

நன்றி இராஜராஜேஸ்வரி!

நன்றி செழியன். கட்டாயம் உங்கள் பதிவினைப் படிக்கிறேன். வாழ்த்துக்கள்!

இந்த வலைப்பூவையும் தெறிந்து கொள்வோமென்று வந்தேன். நடைமுறையை நன்றாகத் தெறிந்து பிறருக்குதவ உன் தகவல்கள் மிகுந்த
உபகாரமாயிருக்கும். நல்லதொரு பதிவு.அன்புடன்

உங்களிடமிருந்து கருத்துரை வருவது மனதுக்கு ரொம்ப தெம்பாக இருக்கிறது.

நன்றி என்பதை விட வேறு ஏதாவது உயர்ந்த சொல் இருக்குமா என்று தேடிக் கொண்டிருக்கிறேன்!

அன்புடன்,
ரஞ்ஜனி

//ஒன்று நாம் புரிந்து கொள்ளுவது; இன்னொன்று நாம் புரிந்து கொண்டதை மற்றவர்களுக்குப் புரிய வைப்பது. இரண்டாவதில் உங்கள் எழுத்து வெற்றி பெற்று விட்டால் பதிவுலகம் உங்கள் வசப்படும்.//

சபாஷ் மேடம்.

எழுத்துத் தொழில் ரகசியங்களையெல்லாம்
புட்டுப்புட்டு வைத்து விட்டீர்கள்.

பலருக்கும் பயன்படும்.

நன்றி. மகிழ்ச்சி. பாராட்டுக்கள். வாழ்த்துகள்.

அன்புடன்
VGK

அன்புள்ள வை.கோ. அவர்களுக்கு,
என்னுடைய ஆசிரியப் பணியில் நான் அறிந்த ரகசியம் இது. பதிவர்களுக்கும் பொருந்தும் என்று எழுதினேன்.

பாராட்டுக்கு நன்றி!

Post a Comment

Twitter Delicious Facebook Digg Stumbleupon Favorites More