Latest News

ஆசையே இன்பத்திற்கு காரணம். பேராசை பெரும் லாபம்.

புத்தர் போதிமரத்தடையில் ஞானம் பெற்று கண்டுபிடித்தாராம். ஆசையே துன்பத்திற்கு காரணம் என்று. ஆனால் இந்த நவீன காலத்தில் ஆசை என்பது இன்றியமையாதது. ஒவ்வொரு மனிதனும் தன்னுடைய வாழ்க்கையில் முன்னேற வேண்டும் என்று ஆசை கொண்டால்தான், வெற்றி அடைய முடியும். 

நூறு கோடி ரூபாய்க்கு மேல் வர்த்தகம் செய்யும் ஒரு தொழிலதிபரிடம் போய் உங்களுக்கு மனநிறைவு வந்துவிட்டதா என்று கேட்டுப்பாருங்கள். கண்டிப்பாக இல்லை என்று தான் கூறுவார். ஏனெனில் போதும் என்ற மனநிறைவு ஒருவருக்கு வந்துவிட்டால், அவருடைய தொழில் தேக்கம் அடைந்துவிட்டது என்றுதான் அர்த்தம். தொழிலில் ஒரு நிலை வந்துவிட்டோமா? சரி அடுத்து என்ன நிலை என்று ஆசையோடு யோசிப்பதில்தான் நம்முடைய மற்றும் நம்மை சேர்ந்தவர்களுடைய வெற்றி இருக்கிறது.

நாம் வளர்ந்து கொண்டே இருந்தால், தானாக நம்மை சார்ந்திருப்பவர்களும், நம்மை சுற்றியிருப்பவர்களும் வளர்ச்சி அடைந்து கொண்டே இருப்பார்கள். நாம் போதும் என்ற மனமே பொன் செய்யும் மருந்து, என நின்று விட்டோம் என்றால், நம்மை சுற்றி இருப்பவர்கள், நம்மை விட்டு விலகி சென்று விடுவார்கள். எனவே தொழில் வளர்ச்சியில் பேராசை பெருநஷ்டம் என்ற பழமொழி எல்லாம் எடுபடாது. 

தொழிலில் மட்டுமல்ல, கல்வி பயில்வதிலும் கூட ஒரு நிலையில் நிறுத்திவிடக்கூடாது. நாம் கல்வி பயில்வது ஒரு நல்ல வேலை வாய்ப்புக்காகதான். ஒரு நிரந்தரமான நல்ல வேலை கிடைத்தவுடன், கற்பதை மட்டும் நிறுத்திவிடக்கூடாது. வேலையை பார்த்துக் கொண்டே மீண்டும் ஏதாவது ஒன்றை நாம் கற்றுக்கொண்டே இருக்கவேண்டும். கற்றுக்கொள்ளும் மனப்பான்மை, தொழில் வளர்ச்சி இவை இரண்டும் நாம் உயிர் நின்றால்தான் நிற்க வேண்டும். அதுவரை தொடர்ந்து கொண்டே இருக்க வேண்டும். 

உனக்கும் கீழே உள்ளவர் கோடி, நினைத்துப் பார்த்து நிம்மதி நாடு என்ற பாடல் தற்காலத்திற்கு பொருந்தாது. உனக்கும் மேலே உள்ளவர் கோடி, அவர்களைப் போல நீயும் ஓடு என்பதுதான் இந்த காலத்திற்கு பொருந்தும்.

போட்டிகள் நிறைந்த இந்த உலகத்தில், வளர்ச்சியில் திருப்தியடைந்து நாம் நின்றுவிட்டால், அது நம்மை கீழ்நோக்கி இழுத்து, பின் நம்மை எங்கே நிறுத்தும் என்பதே நமக்கு தெரியாமல் போய்விடும்., எந்த நிலையிலும் நம்முடைய வளர்ச்சி சதவிகிதம் ஏற்றத்தில் இருக்க வேண்டுமேயன்றி ஒருபோதும் நின்று விடவோ அல்லது இறக்கத்திலோ இருக்க கூடாது.

Follow by Email

Recent Post