படித்து ‘முடிக்க’ வேண்டாம்!



சென்ற பதிவில் 'தினங்களை' பற்றி எழுதுவதைப் பார்த்தோம்.
இன்று படித்தல் என்பதைப் பற்றிய ஒரு பதிவு.

படித்தல் என்பது மாணவர்களுக்கு மட்டுமல்ல; வலைபதிவர்களுக்கும் அவசியம் என்பதை சொல்லவே இந்தப் பதிவு.

‘படித்ததனால் அறிவு பெற்றோர் ஆயிரம் உண்டு
பாடம் படிக்காத மேதைகளும் பாரினில் உண்டு....’

‘படிக்காமலேயே நான் மேதை ஆகிவிடுவேன்....ஏன் படி படி என்று கழுத்தை அறுக்கிறாய்’ என்று இந்தத் தலை முறையினர்  பலர் கேட்கிறார்கள். படிக்கும் வழக்கம் குறைந்து வருகிறது என்று கூட ஒரு சாரார் சொல்லுகிறார்கள்.

‘மனிதனும் ஒரு சமூக விலங்கு’ என்று சமூகவியலில் ஒரு குறிப்பு உண்டு. எப்படி சிரிப்பு என்பது மனிதனை விலங்குகளில் இருந்து தனித்துக் காட்டுகிறதோ, அதேபோல படிப்பு என்பதும் மனிதனுக்கே உரித்தான ஒன்று.

எந்த ஒரு மொழியில் வல்லவனாக வேண்டும் என்றாலும் 3 R கள் முக்கியமானவை. அது என்ன மூன்று R கள்?

Reading – படித்தல்,
Retaining – படித்தவற்றை மனதில் நிலை நிறுத்திக் கொள்ளுதல் 
Recalling – நினைவு படுத்திக் கொள்ளுதல்

முதலில் நிறையப் படிக்க வேண்டும். படித்தவற்றை நினைவில் வைத்துக்கொள்ள வேண்டும். நினைவில் வைத்துக்கொண்டவற்றை தேவைப்பட்ட சமயத்தில் கவனத்திற்குக் கொண்டு வரவேண்டும் – தானாகவே வரும்!

இவையெல்லாம் ஒரே சமயத்தில் நடைபெறுபவை, எப்படி? படிக்கும்போதே மனம் அவற்றை நினைவில் வைத்துக்கொள்ளும். நினைவில் நின்றவற்றை எழுதும்போதும், பேசும்போதும்  பிறரிடம் பகிர்ந்து கொள்ளலாம்.

இங்கு நான் படிப்பது என்று சொல்லுவது பாடப் புத்தகங்களை தவிர்த்த பிற புத்தகங்களை படிப்பது. அதாவது நமது அறிவை விசாலப்படுத்திக் கொள்ள; உலகத்தை இன்னும் நன்றாகப் பார்க்க (பார்ப்பது என்பது வெற்றுப் பார்வை அல்ல) மனிதர்களைப் புரிந்து கொள்ள; எல்லாவற்றிற்கும் மேலாக நம்மை நாமே துல்லியமாக அறிய. நமது நிறை குறைகளை அறிய. குறைகளைக் களைய, நிறைகளை அதிகரிக்க!


இதற்கு நீங்கள் ரொம்பவும் சிரமப் படத் தேவையில்லை. முதலாவதை செய்ய ஆரம்பித்தால் தானாகவே மற்ற இரண்டும் நடந்து விடும்!
படியுங்கள் – கவனமாக, நிறுத்தி, நிதானமாக, ஆழ்ந்து. ஒவ்வொரு வார்த்தையையும் உள்வாங்கிக்கொண்டு படியுங்கள். உங்களை அறியாமல் நீங்கள் படித்தவை மனதில் படிந்து விடும். மனதில் படிந்தவை சரியான சமயத்தில் பகிர்தலாக வெளி வரும்.


என்னிடம் வரும் மாணவர்கள் நிறையப்பேர் சொல்லுவார்கள்: மேடம்! எனக்கு ஆங்கிலம் எழுத வரும்; படிக்க வரும் ஆனால் பேச வராது’ என்று.


எழுத்துக்களை அடையாளம் கண்டுகொள்வது படிப்பது அல்ல. அதைபோல எழுத்துக்கள் தெரியும் என்று எழுதுவது எழுத்தல்ல; படிக்கும்போதும் எழுதும்போதும் என்ன எழுதுகிறோம், என்ன படிக்கிறோம் என்று உணர்ந்து எழுதுவது படிப்பதுதான் நிஜமான எழுத்து, படிப்பு. அப்படிப் படித்து, அப்படி எழுதினால் தானாகவே பேசவும் வரும்.


வலைப்பதிவர்களுக்கு இந்தப் படிப்பு இன்றியமையாதது. படிப்பு உங்களது எண்ணங்களை மெருகூட்டும். நல்ல எழுத்துக்களை அடையாளம் காட்டும். இன்னவற்றை எழுதலாம் என்று உங்களுக்கு வழி காட்டும்.


உங்களது எழுத்துக்கள் உங்கள் ரசனையைக் காட்டும். படிப்பு உங்கள் ரசனையை அதிகரிக்கும்.


இன்னொரு விஷயமும் சொல்ல விரும்புகிறேன்:
சென்ற முறை சென்னை சென்றிருந்தபோது என் தோழி வீட்டில் ஒரு புத்தகம் பார்த்தேன். ‘ஸ்ரீ வைஷ்ணவக் கட்டுரைகள்’ என்று. நான் படித்துவிட்டுத் தரவா என்றேன் தோழியிடம். ‘ம்! 80 கட்டுரைகள் இருக்கின்றன. பெங்களூர் போவதற்குள் நீ முடித்து விடலாம்’ என்றாள். ‘படித்து முடிப்பதா?’ என்றேன். ‘உன்னைப் பற்றி தெரியும். நீ எத்தனை முறை வேண்டுமானாலும் படித்து விட்டுக் கொடு’ என்றாள் தோழி.


எந்த ஒரு புத்தகத்தையும் ஒரே முறை படித்து விட்டு ‘படித்து விட்டேன்’ என்பது சரியல்ல. திரும்பத்திரும்ப படிக்க வேண்டும். ஒவ்வொருமுறையும் ஒரு புதிய விஷயம் கவனத்திற்கு வரும். இதைக் கவனிக்கவே இல்லையே என்று திரும்ப படிக்கத் தூண்டும். புத்தகங்களுக்கு, அவற்றில் இருக்கும் எழுத்துக்களுக்கு  நம்மை கவரும் சக்தி உண்டு. அந்த சக்தி அதிக காலம் நம்மை ஆளும்.


குழந்தைகளுக்கு சின்ன வயதில் இருந்தே புத்தகங்களை அறிமுகப் படுத்துங்கள். பிற்காலத்தில் புத்தகங்கள் அவர்களை வழி நடத்தும். அவர்களை எழுதத் தூண்டுங்கள். நாளை அவர்கள் உலகுக்கு வழிகாட்டியாக மாறுவார்கள்.


குழந்தைகளின் மனம் மிகவும் மென்மையானது. அவர்களின் உலகம் தனி. யாராலும் அவ்வளவு சீக்கிரம் அங்கு நுழைய முடியாது. ஆனால் நல்ல புத்தகங்கள் எளிதாக அவர்கள் மனதில் இடம் பெறும்.


நிறையப் படியுங்கள்; திரும்பத்திரும்பப் படியுங்கள்; நீங்கள் பெற்ற அனுபவத்தை வலைப்பதிவில் பகிர்ந்து கொள்ளுங்கள்!

திரு தனபாலனின் தூண்டுதலால் தான் இந்தப் பதிவு. அவருக்கு நன்றி!

முதல் முறையாக வருபவர்களுக்கும் போன பதிவுகளை படிக்காதவர்களுக்கும்: 





15 comments:

மிகவும் பயனுள்ள பதிவு அம்மா...

அனைவருக்கும் நிச்சயம் பிடித்திரருக்கும்...

படித்தல் என்பது நமது வாழ்க்கையில் முக்கியமான ஒன்று...

கற்க இன்னும் ஆயிரம் ஆயிரம் இருக்கு...

சூப்பர் மா...

பட்டைய கிளப்புங்க...

நன்றி தொழிற்களம் குழுவினருக்கு!

உண்மை அம்மா.
நிறைய படிப்பவர்களால் தான் சிறப்பாக எழுத முடியும்.
என் தந்தை கூட சொல்லுவார் நிறைய படிக்க வேண்டும் என்று.

//எந்த ஒரு புத்தகத்தையும் ஒரே முறை படித்து விட்டு ‘படித்து விட்டேன்’ என்பது சரியல்ல//

இப்படி ஒரு அறிவுரை நான் இதுவரை கேட்டதில்லை. பெரும்பாலும் நான் ஒரு புத்தகத்தை ஒரு முறை தான் படிக்கிறேன் (பாடப் புத்தகம் தவிர :P )

இனி முயற்சி செய்து பார்க்கிறேன்.

அருமையான பதிவிற்கு நன்றி அம்மா.

/* எழுத்துக்களை அடையாளம் கண்டுகொள்வது படிப்பது அல்ல. அதைபோல எழுத்துக்கள் தெரியும் என்று எழுதுவது எழுத்தல்ல; படிக்கும்போதும் எழுதும்போதும் என்ன எழுதுகிறோம், என்ன படிக்கிறோம் என்று உணர்ந்து எழுதுவது படிப்பதுதான் நிஜமான எழுத்து, படிப்பு. அப்படிப் படித்து, அப்படி எழுதினால் தானாகவே பேசவும் வரும். */

இவைதான் என்னை மிகவும் கவர்ந்த வரிகள். நான் வகுப்புகளில் பொதுவாக எதாவது ஒரு விசயத்தினை பேச சொன்னால் " ஒரு சொற்பொழிவே நடத்திவிடுவேன் " ஆனால் படிப்பில் நேர் எதிர் . நான் உங்கள் கருத்தினை என் தாத்தாவிடம் இருந்து கற்றேன். , இளைய தலைமுறையை வழிநடத்துங்கள் நன்றி,

நன்றி செழியன். உங்களைப் போல இளைய தலைமுறை தான் எனக்கு வேண்டும். உங்களை என் எழுத்துக்கள் கவருவது மகிழ்ச்சி!

அன்பு கண்மணி,
நிறையப் பேர் வேக வேகமாக ஒரு புத்தகத்தைப் படித்து விட்டு 'முடித்து' விட்டேன் என்பார்கள்.

நான் மிகவும் தெரிவு செய்துதான் புத்தகங்களைப் படிப்பேன்.

கல்கியின் 'பொன்னியின் செல்வன்' கணக்கில்லாத முறை படித்திருக்கிறேன்.
இன்னுமும் படிப்பேன்.


அதேபோல 'Alchemist' பலதடவை படித்தும் இன்னும் ஏதோ செய்தி அந்தப் புத்தகத்தில் ஒளிந்து இருப்பது போலத் தோன்றும்.

புத்தகங்களின் தாக்கங்கள் மிகவும் வலிமையானவை.


அன்புடன்,
ரஞ்ஜனி

நன்றி அம்மா. நீங்கள் நான் எழுதி இருக்கும் " விரட்டுவோம் தமிழின துரோகிகளை " என்ற நான்கு பதிவுகளையும் படித்து பாருங்கள். உண்மை விளங்கும் மேலும் உங்கள் பதிவை பிரபல படுத்தும் ஒரு வழி முறையை கூட சொல்லிருக்கிறேன், வலைப் பதிவு சம்பந்தமாக எந்த சந்தேகம் இருந்தாலும் கேளுங்கள், என் எழுத்துக்கள் உங்களை கவருகிறது என்ற பாராட்டுக்கு நன்றி,இது போலே எழுதுவது, படிப்பது தொடர்பான புதிய கருத்துகளை பதிவிடுங்கள் அம்மா , நன்றி

மனதில் பதியும்படி படிக்க எவ்வளவு வழிகள் மனதில் தோன்றினால் கூட இவ்வளவு விதரணையாக வழிகளைச் சொல்வது கடினம். மனதில் ஏற்கும்படியான கட்டுரை எல்லோரும் வரவேற்கும்
ஒன்று. உபயோகமான கட்டுரை.ரஞ்சனி
பாராட்டுகள்

மனதில் பதியும்படி படிக்க எவ்வளவு வழிகள் மனதில் தோன்றினால் கூட இவ்வளவு விதரணையாக வழிகளைச் சொல்வது கடினம். மனதில் ஏற்கும்படியான கட்டுரை எல்லோரும் வரவேற்கும்
ஒன்று. உபயோகமான கட்டுரை.ரஞ்சனி
பாராட்டுகள்

A good leader must be a good reader என்று ஒரு ஆங்கில் சொலவடை உண்டு..
"புத்தகங்கள்-நாம் வரம் வாங்க யாரோ ஒருவர் செய்து வைத்த தவம்"-வைரமுத்து.
புத்தக வாசிப்பாளர்களின் எண்ணிக்கை குறைந்துவிட்டது என்பது வருத்தமான விசயம்...இருந்தாலும் ஒரு வகையில் மனம் ஆறுதல் அடைகிறது " முட்டாள்களுக்கும் உலகில் இடம் கொடுங்கள் அவர்களை வைத்துத் தான் அறிவாளிகள் அளக்கப்படுகிறார்கள்" என்கிற T.N முரளிதரன் சார் சொன்ன விசயத்தை நினைத்து பார்த்து.

//...எழுத்துக்களை அடையாளம் கண்டுகொள்வது படிப்பது அல்ல....// இந்த பத்தி மிக அருமை..

நன்றி காமாட்சி அம்மா!

நன்றி விஜயன்! உங்களைபோன்ற இளம் தலைமுறையினரிடையே என் எழுத்துக்கள் எடுபடுவது பற்றி மகிழ்ச்சி.

சிறப்பாக சொல்லி உள்ளீர்கள்...

மிக்க நன்றி அம்மா...

இந்தத் தொடர் வெளியீடு பற்றி எனக்குத் தங்களிடமிருந்து மெயில் தகவல் லிங்க் ஏதும் வரவில்லை.

அதனால் தற்செயலாக இப்போது தான் நானாகவே வந்து முழுவதுமாகப் படித்து முடித்தேன்.

நல்ல பயனுள்ள பதிவு. பாராட்டுக்கள்.
வாழ்த்துகள்.

அன்புடன்
VGK

அன்புள்ள வை.கோ. அவர்களுக்கு,
அத்தனை பதிவுகளையும் படித்து கருத்துரையும் சொல்லி இருக்கிறீர்கள், நன்றி.

லிங்க் அனுப்பாததற்கு மன்னிக்கவும்.

குட்டவும் குட்டி (லிங்க் அனுப்பாததற்கு)கட்டுரையைப் பாராட்டித் தட்டியும் கொடுத்த உங்கள் பெருந்தன்மைக்குத் தலை வணங்குகிறேன்.

Post a Comment

Twitter Delicious Facebook Digg Stumbleupon Favorites More